ਘਰ, ਪਲਾਟ, ਖੇਤ ਮਾਲਕਾਂ ਲਈ ਚੇਤਾਵਨੀ, ਹਰ ਜ਼ਮੀਨ ਦੀ ਹੋਵੇਗੀ ਡਿਜੀਟਲ ਪਛਾਣ

National News : ਤੁਹਾਡੇ ਨਾਮ ’ਤੇ ਜ਼ਮੀਨ ਹੈ, ਘਰ ਹੈ ਜਾਂ ਕੋਈ ਪਲਾਟ ਹੈ… ਤਾਂ ਆਉਣ ਵਾਲੇ ਸਾਲਾਂ ਵਿੱਚ ਜ਼ਮੀਨ ਨਾਲ ਜੁੜੇ ਕਾਗਜ਼ੀ ਰਿਕਾਰਡਾਂ ਨੂੰ ਲੈ ਕੇ ਤੁਹਾਡੀ ਦੌੜ-ਭੱਜ ਕਾਫ਼ੀ ਘੱਟ ਹੋ ਸਕਦੀ ਹੈ! ਕਿਉਂਕਿ ਕੇਂਦਰ ਸਰਕਾਰ ਹੁਣ ਦੇਸ਼ ਦੇ ਜ਼ਮੀਨੀ ਰਿਕਾਰਡਾਂ ਨੂੰ ਇੱਕ ਹੋਰ ਵੱਡੇ ਪੱਧਰ ’ਤੇ ਡਿਜੀਟਲ ਕਰਨ ਜਾ ਰਹੀ ਹੈ। ਡਿਜੀਟਲ ਇੰਡੀਆ ਲੈਂਡ ਰਿਕਾਰਡਸ ਮਾਡਰਨਾਈਜ਼ੇਸ਼ਨ ਪ੍ਰੋਗਰਾਮ ਦੇ ਤੀਜੇ ਚਰਨ ਯਾਨੀ ਡੀ.ਆਈ.ਐੱਲ.ਆਰ.ਐੱਮ.ਪੀ. 3.0 ਦੇ ਕਾਰਜਕਾਰੀ ਦਿਸ਼ਾ-ਨਿਰਦੇਸ਼ ਜਾਰੀ ਕਰ ਦਿੱਤੇ ਗਏ ਹਨ। ਇਹ ਪ੍ਰੋਗਰਾਮ 2026 ਤੋਂ 2031 ਤੱਕ ਚੱਲੇਗਾ ਅਤੇ ਇਸ ’ਤੇ ਲਗਭਗ 565.5 ਕਰੋੜ ਰੁਪਏ ਖਰਚ ਕੀਤੇ ਜਾਣਗੇ। ਇਸ ਦਾ ਮਕਸਦ ਸਿਰਫ਼ ਪੁਰਾਣੇ ਕਾਗਜ਼ ਸਕੈਨ ਕਰਨਾ ਨਹੀਂ, ਸਗੋਂ ਜ਼ਮੀਨ ਦੀ ਮਾਲਕੀ, ਰਜਿਸਟ੍ਰੇਸ਼ਨ, ਨਕਸ਼ੇ ਅਤੇ ਹੋਰ ਰਿਕਾਰਡਾਂ ਨੂੰ ਇੱਕ-ਦੂਜੇ ਨਾਲ ਡਿਜੀਟਲ ਤਰੀਕੇ ਨਾਲ ਜੋੜਨਾ ਹੈ।ਇਸ ਯੋਜਨਾ ਦਾ ਸਭ ਤੋਂ ਖ਼ਾਸ ਪਹਿਲੂ ਹੈ 14 ਅੰਕਾਂ ਵਾਲਾ ਵਿਸ਼ੇਸ਼ ਜ਼ਮੀਨੀ ਪਛਾਣ ਨੰਬਰ, ਜਿਸ ਨੂੰ ਯੂਨੀਕ ਲੈਂਡ ਪਾਰਸਲ ਆਈਡੈਂਟੀਫਿਕੇਸ਼ਨ ਨੰਬਰ ਜਾਂ ਯੂ.ਐੱਲ.ਪੀ.ਆਈ.ਐੱਨ. ਕਿਹਾ ਜਾ ਰਿਹਾ ਹੈ। ਸੌਖੇ ਸ਼ਬਦਾਂ ਵਿੱਚ ਕਹੀਏ ਤਾਂ ਹਰ ਜ਼ਮੀਨ ਨੂੰ ਇੱਕ ਵਿਸ਼ੇਸ਼ ਡਿਜੀਟਲ ਪਛਾਣ ਮਿਲੇਗੀ। ਇਸ ਨਾਲ ਜ਼ਮੀਨ ਨਾਲ ਸਬੰਧਿਤ ਰਿਕਾਰਡ, ਨਕਸ਼ਾ ਅਤੇ ਹੋਰ ਵੇਰਵੇ ਪਛਾਣਨਾ ਸੌਖਾ ਹੋ ਸਕੇਗਾ। ਇਸ ਦੇ ਨਾਲ ਜ਼ਮੀਨੀ ਨਕਸ਼ਿਆਂ ਨੂੰ ਭੂਗੋਲਿਕ ਸਥਿਤੀ ਨਾਲ ਜੋੜਨ ਦੀ ਪ੍ਰਕਿਰਿਆ ਵੀ ਅੱਗੇ ਵਧਾਈ ਜਾਵੇਗੀ। ਇਸ ਦਾ ਫਾਇਦਾ ਖਾਸ ਕਰਕੇ ਜ਼ਮੀਨ ਖਰੀਦਣ ਜਾਂ ਵੇਚਣ ਵਾਲੇ ਲੋਕਾਂ ਨੂੰ ਹੋ ਸਕਦਾ ਹੈ। ਉਦਾਹਰਨ ਵਜੋਂ, ਕਿਸੇ ਪਲਾਟ ਦੀ ਮਾਲਕੀ, ਉਸ ਦੀ ਪਛਾਣ ਅਤੇ ਨਕਸ਼ੇ ਨਾਲ ਜੁੜੀ ਜਾਣਕਾਰੀ ਨੂੰ ਪਹਿਲਾਂ ਨਾਲੋਂ ਸੌਖੇ ਢੰਗ ਨਾਲ ਮਿਲਾਇਆ ਤੇ ਜਾਂਚਿਆ ਜਾ ਸਕੇਗਾ। ਸਰਕਾਰ ਦਾ ਟੀਚਾ ਇਹ ਵੀ ਹੈ ਕਿ ਵੱਖ-ਵੱਖ ਵਿਭਾਗਾਂ ਵਿੱਚ ਪਏ ਜ਼ਮੀਨੀ ਰਿਕਾਰਡਾਂ ਨੂੰ ਡਿਜੀਟਲ ਤਰੀਕੇ ਨਾਲ ਆਪਸ ਵਿੱਚ ਜੋੜਿਆ ਜਾਵੇ।

ਇਸ ਨਾਲ ਭਵਿੱਖ ਵਿੱਚ ਜ਼ਮੀਨ ਦੀ ਰਜਿਸਟ੍ਰੇਸ਼ਨ, ਮਾਲਕੀ ਅਤੇ ਨਕਸ਼ਿਆਂ ਨਾਲ ਜੁੜੀ ਜਾਣਕਾਰੀ ਲਈ ਇੱਕ ਦਫ਼ਤਰ ਤੋਂ ਦੂਜੇ ਦਫ਼ਤਰ ਜਾਣ ਦੀ ਲੋੜ ਘੱਟ ਹੋ ਸਕਦੀ ਹੈ। ਕਿਸਾਨਾਂ ਲਈ ਵੀ ਡਿਜੀਟਲ ਜ਼ਮੀਨੀ ਰਿਕਾਰਡ ਲਾਭਦਾਇਕ ਹੋ ਸਕਦੇ ਹਨ। ਜ਼ਮੀਨ ਨਾਲ ਸਬੰਧਿਤ ਸਹੀ ਰਿਕਾਰਡ ਉਪਲਬਧ ਹੋਣ ਨਾਲ ਬੈਂਕਾਂ ਅਤੇ ਵਿੱਤੀ ਸੰਸਥਾਵਾਂ ਤੋਂ ਕਰਜ਼ੇ ਦੀ ਪ੍ਰਕਿਰਿਆ ਵਿੱਚ ਸਹਾਇਤਾ ਮਿਲ ਸਕਦੀ ਹੈ। ਸਰਕਾਰ ਮੁਤਾਬਕ ਪਿਛਲੇ ਚਰਨਾਂ ਦੌਰਾਨ 99.9 ਫੀਸਦੀ ਹੱਕਾਂ ਦੇ ਰਿਕਾਰਡ ਡਿਜੀਟਲ ਕੀਤੇ ਜਾ ਚੁੱਕੇ ਹਨ।ਇਸ ਤੋਂ ਇਲਾਵਾ ਲਗਭਗ 97 ਫੀਸਦੀ ਜ਼ਮੀਨੀ ਨਕਸ਼ੇ ਡਿਜੀਟਲ ਹੋ ਚੁੱਕੇ ਹਨ ਅਤੇ ਸਬ-ਰਜਿਸਟਰਾਰ ਦਫ਼ਤਰਾਂ ਵਿੱਚ ਲਗਭਗ 99 ਫੀਸਦੀ ਕੰਪਿਊਟਰਾਈਜ਼ੇਸ਼ਨ ਪੂਰੀ ਹੋ ਚੁੱਕੀ ਹੈ। ਹੁਣ ਤੀਜੇ ਚਰਨ ਵਿੱਚ ਇਨ੍ਹਾਂ ਸਾਰੀਆਂ ਪ੍ਰਣਾਲੀਆਂ ਨੂੰ ਹੋਰ ਵਧੀਆ ਢੰਗ ਨਾਲ ਆਪਸ ਵਿੱਚ ਜੋੜਨ ’ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ।ਪਰ ਇੱਥੇ ਇੱਕ ਗੱਲ ਬਹੁਤ ਜ਼ਰੂਰੀ ਹੈ। ਡਿਜੀਟਲ ਰਿਕਾਰਡ ਬਣਨ ਦਾ ਮਤਲਬ ਇਹ ਨਹੀਂ ਕਿ ਤੁਹਾਡੇ ਪੁਰਾਣੇ ਜ਼ਮੀਨੀ ਕਾਗਜ਼ ਰੱਦ ਹੋ ਜਾਣਗੇ। ਪੁਰਾਣੇ ਦਸਤਾਵੇਜ਼, ਰਜਿਸਟ੍ਰੇਸ਼ਨ ਪੱਤਰ ਅਤੇ ਹੋਰ ਅਸਲ ਰਿਕਾਰਡ ਸੰਭਾਲ ਕੇ ਰੱਖਣਾ ਅਜੇ ਵੀ ਜ਼ਰੂਰੀ ਹੈ। ਕੁੱਲ ਮਿਲਾ ਕੇ, ਡੀ.ਆਈ.ਐੱਲ.ਆਰ.ਐੱਮ.ਪੀ. 3.0 ਦਾ ਟੀਚਾ ਜ਼ਮੀਨ ਦੇ ਰਿਕਾਰਡਾਂ ਨੂੰ ਸਿਰਫ਼ ਡਿਜੀਟਲ ਬਣਾਉਣਾ ਨਹੀਂ, ਸਗੋਂ ਮਾਲਕੀ, ਰਜਿਸਟ੍ਰੇਸ਼ਨ ਅਤੇ ਨਕਸ਼ਿਆਂ ਨੂੰ ਇੱਕ ਸਮਗਰ ਡਿਜੀਟਲ ਪ੍ਰਣਾਲੀ ਨਾਲ ਜੋੜਨਾ ਹੈ। ਆਉਣ ਵਾਲੇ ਸਮੇਂ ਵਿੱਚ ਇਸ ਨਾਲ ਜ਼ਮੀਨ ਨਾਲ ਜੁੜੇ ਕੰਮ ਹੋਰ ਸੌਖੇ, ਤੇਜ਼ ਅਤੇ ਪਾਰਦਰਸ਼ੀ ਬਣਾਉਣ ਦੀ ਉਮੀਦ ਹੈ।